صحيح غاب وبعد غبنا لكن ذكراه تجمعنا

والله ماغاب عن بالي
وانه بقلبي بقى غالي
وادري معاه منزلي عالي
ومفارقني على باله

يابارق ناض بشعاعه
أشعلت في خاطري أوجاعه
رجعته لماضي راعه
من عقب من غاب بوصاله

صحيح غاب وبعد غبنا
لكن ذكراه تجمعنا
وظروف عن بعض تبعدنا
كلا مضى دربه لحاله

الوقت مايمحي الذكرى
وقلوبنا باسرها أسره
تكتب لمن بعدنا يقرأ
عن ود ماطويت احباله

يالليل يابسط اسكونه
هيجت للشاعر شجونه
حتى هجر نومه عيونه
يبكي لحاله وغرباله

شاعر شعر يترجم احاسيسه
في ليل هيج هواجيسه
والحبر خطط قراطيسه
سجل من الشوق مواله

ياشوق شوقي على الملقى
للصاحب اللي مع الفرقا
خلاني أسامر البرقا
وقول يابرق وش حاله

لازارني طيفه بخلوه
اتذكر أيامي الحلوه
واعيش في عالمي سلوى
وقهوي القلب بدلاله

وان جاب طاريه لطاري
يفز قلبي بتذكاري
وسج في عالم أفكاري
ويمد للكيف فنجاله

ياصاحبي والأمل باقي
نتقابل وننهي افراقي
وتزين حروف أوراقي
ويحقق الشاعر أماله

تدري وش اللي مسليني
أنك مع البال تطريني
وعلى عذابه تواسيني
وتقدر البعد واهواله